昨日農曆五月初九，沙田城門河鑼鼓喧天，來自十個其他國家同地區健兒掄槳如飛，進行國際龍舟競渡，施盡渾身解數。可惜兩岸觀眾寥寥可數，計來計去得幾百人，話唔埋睇熱鬧旁觀者仲少過龍舟健兒。
俗語話：「過後媒人秋後扇」，即係過氣背時冇人吼。香港特區別出心裁，導演一幕「端午過後賽龍舟」，夠晒反傳統。老友記，做事想成功，最緊要係當時得令，如果有人過BoxingDay，仲個袋，掛住白鬚上街扮聖誕老人派禮物，唔畀人話佢傻，都笑佢癡，又或者時髦，叫佢做「聖誕阿叔」，點都唔會叫佢做聖誕老人！五月初九先至搞國際鬥龍舟，又算係乜一回事呢，難得有位政務司司長陪佢癲，去為佢頒獎，但係多數市民睬佢都傻。
香港特區政府，做乜都慢人幾拍。國際扒龍舟賽事遲過隔籬埠幾天，錯過端午正日，最多係觀眾疏落，畀人瘀，雖然難睇，但高官都慣！但係，特區政府呢隻大龍舟，畀班高官扒九年，由亞洲猛龍變鼻涕蟲，將香港號龍舟帶入邊緣化漩渦，困落去轉唔番出咁就大件事咯！
最新足球訊息隨時更新 賽龍奪錦，講究係一馬當先，東方報業集團最富於前驅精神，其他唔講，就講世界盃報道，全港報壇未起步，《東方日報》與《太陽報》聯手編印《世界盃熱身版32強DNA》，率先熱爆全港，成為球迷追捧天書。後來《東方日報》與《太陽報》再度聯手編印《2006世界盃豪門夜宴》，72小時之內全部換購一空，遲來向隅者甚眾。兩本特刊成為全港球迷睇世界盃必備天書，《東方日報》領導潮流，由此可見。
《東方日報》更有新猷，就係發揮多媒體功能，推出《流動地帶》手機網同《波經》網，隨時隨地為讀者提供最新足球訊息，包括練在出場前最新陣容，各隊最新賠率等等，完全切合讀者需要。所以，讀者睇世界盃，必捧《東方日報》。《東方日報》本求新求真精神，數十年來創出好多新路數，吸引全港300幾萬讀者，30年來一直雄踞報壇冠軍，就係敢為天下先。香港政府想勵精圖治，不妨向《東方日報》偷師，千祈唔好滿足於五月初九賽龍舟，沾沾自喜，徒然貽笑四方。